ದೇಶ ಸುದ್ದಿಗಳು

 Lok sabha: 35 ತಿದ್ದುಪಡಿ ಮಾಡಿ ಹಣಕಾಸು ಮಸೂದೆ 2025ಕ್ಕೆ ಲೋಕಸಭೆ ಅಂಗೀಕಾರ!

ಹಣಕಾಸು ಮಸೂದೆಗೆ ಅಂಗೀಕಾರ ಪಡೆಯುವ ಮೂಲಕ ಬಜೆಟ್ ಅನುಮೋದನೆ ಪ್ರಕ್ರಿಯೆಯು ಲೋಕಸಭೆಯಲ್ಲಿ ಪೂರ್ಣಗೊಂಡಂತಾಯಿತು.

ನವದೆಹಲಿ: ಆನ್ ಲೈನ್ ಜಾಹೀರಾತುಗಳ ಮೇಲೆ ಶೇ. 6ರಷ್ಟು ಡಿಜಿಟಲ್ ತೆರಿಗೆ ರದ್ದತಿ ಸೇರಿದಂತೆ ಒಟ್ಟು 35 ತಿದ್ದುಪಡಿಗಳೊಂದಿಗೆ ಹಣಕಾಸು ಮಸೂದೆ 2025ಕ್ಕೆ ಲೋಕಸಭೆಯಲ್ಲಿ ಮಂಗಳವಾರ ಅಂಗೀಕಾರ ದೊರೆಯಿತು.

ಹಣಕಾಸು ಮಸೂದೆಗೆ ಅಂಗೀಕಾರ ಪಡೆಯುವ ಮೂಲಕ ಬಜೆಟ್ ಅನುಮೋದನೆ ಪ್ರಕ್ರಿಯೆಯು ಲೋಕಸಭೆಯಲ್ಲಿ ಪೂರ್ಣಗೊಂಡಂತಾಯಿತು. ಮಸೂದೆಯನ್ನು ಈಗ ರಾಜ್ಯಸಭೆಯು ಪರಿಗಣಿಸಬೇಕಾಗಿದೆ. ಅಲ್ಲಿಯೂ ಅನುಮೋದನೆ ದೊರೆತಲ್ಲಿ 2025-26ನೇ ಸಾಲಿನ ಬಜೆಟ್ ಪ್ರಕ್ರಿಯೆ ಪೂರ್ಣಗೊಂಡಂತಾಗುತ್ತದೆ.

2025-26ನೇ ಸಾಲಿನ ಕೇಂದ್ರ ಸರ್ಕಾರದ ಬಜೆಟ್ ವೆಚ್ಚದ ಗಾತ್ರ ಒಟ್ಟು ರೂ. 50.65 ಲಕ್ಷ ಕೋಟಿಯಾಗಿದೆ. ಇದು ಪ್ರಸಕ್ತ ಸಾಲಿಗೆ ಹೋಲಿಸಿದಲ್ಲಿ ಶೇ. 7.4 ರಷ್ಟು ಅಧಿಕವಾಗಿದೆ. ಮುಂದಿನ ಹಣಕಾಸು ವರ್ಷದಲ್ಲಿ ಬಂಡವಾಳ ವೆಚ್ಚವು ರೂ.11. 22 ಲಕ್ಷ ಕೋಟಿ ಹಾಗೂ ಪರಿಣಾಮಕಾರಿ ಬಂಡವಾಳ ವೆಚ್ಚ ರೂ. 15. 48 ಲಕ್ಷ ಕೋಟಿಯಾಗಿದೆ. ತೆರಿಗೆ ಮೂಲಕ ಹರಿದು ಬರುವ ಆದಾಯ ಸಂಗ್ರಹವು ರೂ. 42. 70 ಲಕ್ಷ ಕೋಟಿಯಾಗಿದ್ದು, ಸಾಲದ ಮೊತ್ತ ರೂ. 14. 01 ಲಕ್ಷ ಕೋಟಿಯಾಗಿದೆ ಎಂದು ಪ್ರಸ್ತಾಪಿಸಿದೆ.

ಬಜೆಟ್ ದಾಖಲೆಗಳ ಪ್ರಕಾರ ಪ್ರಸಕ್ತ ಸಾಲಿನಲ್ಲಿ ಕೇಂದ್ರ ಸರ್ಕಾರದ ಪ್ರಾಯೋಜಿತ ಯೋಜನೆಗಳಿಗೆ ರೂ. 5,41,850.21 ಕೋಟಿ ಮೀಸಲಿಡಲಾಗಿದೆ. ಕಳೆದ ವರ್ಷ ಇದು ರೂ. 4,15,356.25 ಕೋಟಿಯಾಗಿತ್ತು. ಮುಂದಿನ ವರ್ಷಕ್ಕೆ ಕೇಂದ್ರ ಯೋಜನೆಗಳಿಗೆ ರೂ. 16.29 ಲಕ್ಷ ಕೋಟಿ ಮೀಸಲಿಡಲಾಗಿದೆ. ಕಳೆದ ವರ್ಷ ರೂ. 15.13 ಲಕ್ಷ ಕೋಟಿಯಷ್ಟಿತ್ತು.

ಪಡೆದ ಸಾಲಕ್ಕೆ ಹೆಚ್ಚಿನ ಮಾರುಕಟ್ಟೆ ಬಡ್ಡಿದರ, ಖಜಾನೆ ಬಿಲ್ಲುಗಳು, ಬಾಹ್ಯ ಸಾಲ, ಸಣ್ಣ ಉಳಿತಾಯ ಹಾಗೂ ಭವಿಷ್ಯ ನಿಧಿ, ರಕ್ಷಣಾ ಇಲಾಖೆಯಲ್ಲಿ ಅಧಿಕ ಬೇಡಿಕೆ ಸೇರಿದಂತೆ ಅನೇಕ ಕಾರಣದಿಂದ 2025-26ನೇ ಸಾಲಿನ ಬಜೆಟ್ ವೆಚ್ಚವೂ ಏರಿಕೆಯಾಗಿದೆ.